English version here

Ranganna Gaeilge, Meán Fómhair 2007

Tá Gaelchultúr Teoranta (www.gaelchultur.com) ag reáchtáil na ranganna anois a bhíodh á stiúradh ag Sult. Tá Gaelchultúr ag tairiscint ranganna ag suas le sé leibhéal, tri huaire sa bhliain:

Cúrsa A: Meán Fómhair - Samhain
Cúrsa B: Feabhra - Aibreán
Cúrsa C: i rith an tsamhraidh

Is é Éamonn Ó Dónaill MA stiúrthóir na gcúrsaí. Tá Éamonn ag múineadh le breis is fiche bliain anuas agus tá leabhair scríofa aige do lucht múinte na Gaeilge agus d'fhoghlaimeoirí na teanga, na cúrsaí ilmheán Turas Teanga agus Now You're Talking agus an leabhar gramadaí Teach Yourself Irish Grammar, a foilsíodh i mí Mheán Fómhair 2005, ina measc.

Seo thíos tuilleadh eolais faoin gcéad chúrsa eile.

Cathain a bheidh an cúrsa ar siúl?
Tosóidh sé ar an 17 Meán Fómhair 2007 agus leanfaidh sé ar aghaidh go dtí tús mhí na Nollag, 2007.

Cé mhéad leibhéal a bheas ann?
Sé leibhéal a bheas i gceist: bunrang 1, bunrang 2, meánrang 1, meánrang 2, ardrang agus rang cruinnis.

Cén fhad a mhairfidh gach rang agus an cúrsa?
Déanfaidh rannpháirtithe freastal ar rang dhá uair an chloig, oíche sa tseachtain, ar feadh dhá sheachtain déag. Ceithre huaire is fiche de theagasc a bheas i gceist ar fad sa chúrsa, mar sin.

Cad iad na hoícheanta den tseachtain a bheas i gceist?

Bunrang 1: Dé Luain
Bunrang 2: Dé Máirt
Meánrang 1: Dé Luain, Dé Máirt nó Dé Céadaoin
Meánrang 2: Dé Luain
Ardrang: Dé Máirt
Rang Cruinnis: Dé Céadaoin

Cén t-am a bheidh na ranganna ar siúl?
Beidh siad ar siúl idir 7.00 - 9.00 p.m.

Cé mhéad a chosnóidh an cúrsa?
Cosnóidh an cúrsa 24 huaire €240.

Cén áit a mbeidh na ranganna ar siúl?
Beidh na ranganna á reáchtáil i gceanncheathrú nua Gaelchultúr in ionad Filmbase i lár Bharra an Teampaill, Baile Átha Cliath. Tá an t-ionad lonnaithe os comhair an Temple Bar Music Centre ar an gCuarshráid. Tá léarscáil le fáil anseo.

Cén cur chuige múinteoireachta a úsáidfear?
Bainfear úsáid as an gcur chuige cumarsáideach sna ranganna go léir. Beidh obair bheirte agus obair ghrúpa i gceist go leanúnach, rud a thabharfaidh deis do na foghlaimeoirí cleachtadh a dhéanamh ar an méid a bheas múinte dóibh. Múinfear teanga úsáideach laethúil agus díreofar ar thoipicí suimiúla atá i mbéal an phobail. Beidh an bhéim ar labhairt agus ar éisteacht den chuid is mó sna ranganna ar fad, seachas sa rang cruinnis.

Leibhéil

Bunrang 1 (Ab initio)
Tá an leibhéal seo dírithe ar dhaoine nach bhfuil eolas ar bith acu ar an nGaeilge nó nach bhfuil acu ach cúpla focal nó frása. Ní bheidh an rang seo oiriúnach dóibh siúd a d’fhreastail ar bhunrang eile le déanaí nó a rinne staidéar ar an nGaeilge sa mheánscoil. Beidh an bhéim ar fhorbairt scileanna labhartha agus éisteachta agus déanfar an ghramadach a mhúineadh i gcomhthéacs den chuid is mó. Faoi dheireadh an chúrsa, beidh rannpháirtithe tar éis foghlaim an chaoi le páirt a ghlacadh i gomhráite bunúsacha laethúla, labhairt fúthu féin agus a gcúlra, an obair atá ar bun acu, etc. Sa chúrsa seo, leanfar an siollabas atá forbartha ag Ionad na dTeangacha, Ollscoil na hÉireann, Má Nuad do Theastas Eorpach na Gaeilge (cf. www.nuim.ie/language/irishexams.html).

Bunrang 2
Tá an leibhéal seo oiriúnach do dhaoine a d’fhreastail ar rang ag an mbunleibhéal cheana féin nó atá ábalta cumarsáid bhunúsach a dhéanamh sa Ghaeilge (beannú do dhaoine agus iad féin a chur in aithne, mar shampla). Ag tús an chúrsa, déanfar athchleachtadh ar nithe a mhúintear sa bhunrang ach bogfar ar aghaidh ina dhiaidh sin chuig toipicí nua nach bpléitear leo ag an leibhéal níos isle. Beidh an bhéim sa chúrsa seo chomh maith ar fhorbairt scileanna labhartha agus éisteachta agus, arís, déanfar an ghramadach a mhúineadh i gcomhthéacs de ghnáth.
Sa chúrsa seo, leanfar an siollabas atá forbartha ag Ionad na dTeangacha, Ollscoil na hÉireann, Má Nuad do Theastas Eorpach na Gaeilge (cf. www.nuim.ie/language/irishexams.html).

Meánrang 1
Tá an leibhéal seo dírithe ar dhaoine a rinne staidéar ar an nGaeilge ar scoil, b’fhéidir roinnt mhaith blianta ó shin, a thuigeann roinnt mhaith den teanga ach nach raibh mórán deiseanna acu ar í a úsáid le blianta beaga anuas. Múinfear nithe bunúsacha ag tús an chúrsa ach leanfaidh an rang ar aghaidh níos tapa ansin ná mar a leanfadh rang ag leibhéal níos ísle. Beidh an bhéim ar fhorbairt scileanna labhartha agus éisteachta ach beidh deiseanna ag na foghlaimeoirí an teanga a scríobh agus a léamh ó am go chéile freisin. Múinfear an ghramadach i gcomhthéacs, de réir mar a bheidh sí ag teastáil.

Meánrang 2
Tá an leibhéal seo oiriúnach do dhaoine a bhfuil Gaeilge réasúnta líofa acu agus a úsáideann í ó am go chéile (go sóisialta, mar shampla). Beidh seans ag an duine a dhéanfaidh freastal ar an rang áirithe seo cur lena stór focal agus níos mó a fhoghlaim faoi ghramadach na Gaeilge. Beidh an bhéim ar na scileanna éagsúla teanga ach ar an éisteacht agus ar an labhairt go háirithe.

Ardrang
Is rang é seo dóibh siúd a bhfuil Gaeilge líofa go leor acu agus a bhfuil cúpla cúrsa Gaeilge déanta acu cheana féin, b'fhéidir. Beidh an bhéim ar labhairt agus ar éisteacht den chuid is mó ach beidh léamh agus obair scríofa i gceist ó am go chéile chomh maith. Díreofar ag tús an chúrsa ar thopaicí a bhaineann go dlúth le saol na bhfoghlaimeoirí (cúlra, obair, caitheamh aimsire, etc.), ach tar éis cúpla seachtain beidh an bhéim ar scéalta atá i mbéal an phobail chomh maith.

Rang Cruinnis
Tá an leibhéal seo dírithe ar dhaoine a bhfuil Gaeilge labhartha an-mhaith acu ach ar mian leo gramadach níos cruinne a bheith acu agus deis a fháil a gcuid scileanna scríofa a fhorbairt. Bainfear úsáid as sleachta as irisí agus nuachtáin agus as míreanna ón raidió, agus beidh réimse leathan gníomhaíochtaí i gceist sna ranganna. Beidh an rang áirithe seo an-oiriúnach dóibh siúd atá ag obair trí mheán na Gaeilge - iriseoirí, státseirbhísigh agus múinteoirí, mar shampla.

Conas a chláróidh mé do chúrsa?
Téigh chuig suíomh Gaelchultúr (www.gaelchultur.com), déan bróisiúr na ranganna a íoslódáil, líon an fhoirm iarratais agus seol í, mar aon le táille an chúrsa, chuig an seoladh atá tugtha. Beidh áis ar fáil ar an suíomh i gceann cúpla mí a chuirfidh ar chumas daoine clárú do chúrsa agus an táille a íoc ar líne.

Is féidir leat clárú chomh maith in ionad Gaelchultur i bhfoirgneamh Filmbase (leibhéal 2) le linn uaireanta oifige. Ní mór glaoch ar (01) 675-3658 roimh ré chun coinne a dhéanamh, áfach.

Eolas breise
Tá eolas breise le fáil ach glaoch ar (01) 675-3658. Is féidir scríobh chomh maith chuig an seoladh eolas@gaelchultur.com nó cuairt a thabhairt ar www.gaelchultur.com.